سرفراز کو امپائر کا انتباہ ، روہت ناراض

ممبئی ۔ سرفراز خان اپنی بیٹنگ کی وجہ سے اکثر خبروں میں رہتے ہیں لیکن ممبئی ٹسٹ کی پہلی اننگز میں اپنی شرارتوں کی وجہ سے وہ سرخیوں میں ہیں۔ دراصل ممبئی ٹسٹ کے پہلے دن سرفراز خان نے کچھ ایسا کردیا کہ امپائرزکو ان سے بات کرنی پڑی۔ انہیں انتباہ بھی دیا گیا اور یہی نہیں کپتان روہت شرما سے بھی شکایت کی گئی۔ تفصیلات کے بموجب سرفراز خان ممبئی ٹسٹ میں شارٹ لیگ پر فیلڈنگ کررہے تھے۔ وہ بیٹرکے بالکل قریب کھڑے تھے اور اس کے ساتھ ہی وہ بیٹر کو کچھ نہ کچھ کہتے بھی نظر آئے ۔ سرفراز خان اتنی باتیں کر رہے تھے کہ نیوزی لینڈ کے بیٹر پریشان ہونے لگے۔ اس کے بعد نیوزی لینڈ کے آل راؤنڈر ڈیرل مچل نے ان کی امپائر سے شکایت کی۔ ڈیرل مچل نے سرفراز کی شکایت امپائرز سے کی تو کپتان روہت شرما ناراض نظر آئے۔ انہیں ڈیرل مچل سے کچھ کہتے ہوئے دیکھا گیا۔ یہ پہلی بار نہیں ہے کہ کھلاڑی یا وکٹ کیپر سے بات نہیں کرتے، ایسا باقاعدگی سے ہوتا ہے لیکن ٹیم انڈیا کو مچل نے امپائر سے شکایت کرنے کا طریقہ پسند نہیں کیا۔